ना फिसिनाय फुख्रियाव दैलाव अक्सिजेन आंखालनि जेंना आरो लानो गोनां राहा
ना फिसिनाय फुख्रियाव दैलाव अक्सिजेननि बिबाङा नांगौ बादियै दं ना गैया बेखौ नोजोर होनाया जोबोरैनो गोनांथार । बे बिथिङाव नोजोर होआब्ला नानि दिहुनथाया खमायलांनायजों लोगोसे नाफोरा गोबां थैलांनायनि गिनांगौ थायो । बिनिखायनो, ना फिसिग्राफोरा आदार आरो हासारनि अनगायैबो, दैयाव दैलाव अक्सिजेननि गोनांथि गोनां बिबांखौ थियै लाखिनाय बिथिङाव बान्जाइथाव राहा लानो नांगौ ।
ना फिसिनाय फुख्रियाव दैलाव अक्सिजेन खमायलांनायनि जानो हाथावना जाहोनफोरखौ गाहायाव होनाय जाबाय—
1. दैमैलु बोथोराव साननि सोराङा थोंजासे नाङैनि जाउनाव दैयाव रज’नाय जाथोसे सोमखोर लाइफाङा बांनानै फुख्रिनि दैखौ खोबथेना लानायनि थाखाय अक्सिजेननि दिहुनथाया खमायलाङो । जाउनाव गोबां सान बोथोरा दैमैलु जानानै थायोब्ला नानि हां लानायनि थाखाय दैयाव अम्लजाननि आंखाल नुजाथिनो हागौ आरो अम्लजान नायगिरना दैनि सा बाहागोसिम हां लानो फैना बेबायदियै नायाखुगा ब्लां ब्लां सिना गिदिंलाबायनो हागौ । थाबैनो नांगौ बादियै राहा लायाब्ला गोबां नाया थैनो हागौ, जर’खायै गेदेर नाया थाबैनो थैनो हागौ ।
2. फुख्रियाव दैनि रुजुनायाव नानि बिबाङा बांद्राय जायोब्लाबो दैनि दैलाव अक्सिजेननि बिबाङा नाफोरनि थाखाय थोजासे जाया ।
3. नानि अनजिमाया बांद्राय जानायजों लोगोसे नानि मैला हगारनायाबो गोबां जायो । लोगोसे होनाय जाग्रा आदार, हासार एबा गुबुन जैब’आरि दाखोरफोरनि बिबाङा बांनानै दैनि मानथाखोआ खमायलांनायजों लोगोसे दैलाव अक्सिजेननि बिबाङाबो खमायलांनो हागौ ।
4. आदार होनाया बांद्रायनाय नङाब्ला खम मानथाखोनि आदार होनायनिथाखाय नाया जायैआव सेवलांनायनि जाउनाव बिसगोनां गेस सोमजिखांनानै दैयाव दैलाव अक्सिजेननि बिबाङा खमायलाङो ।
5. फुख्रियाव गोबां हाग्रा बंग्रा रज’नानै सानदुं आरो बार नांनायाव हेंथा सोमजियोब्लाबो दैयाव दैलाव अक्सिजेननि बिबाङा खमायलाङो ।
6. खाथिनिफ्राय बोहैबोनाय अखानि दैया गुबुंनाय मुवा बेसाद बुखारना लाबोनो हागौ, जायफोरा फुख्रिनि दैनि मानथाखोखौ खमायनानै अक्सिजेननि बिबांखौ हायलांहोनो हागौ ।
7. गेदेर नाफोरा हां लानायनि थाखाय गोबां अक्सिजेननि गोनांथि जायो ।गेदेर नाफोरनि देहायाव आजायनाय हरमन बिखान्थिनि जेंना नुजाथियोब्ला आरो बेजों लोगोसे खम बिबांनि दैलाव अक्सिजेननि जेंनाया बेफोर नाखौ थाबैनो थैनायनि लामासिम लानानै थाङो ।
जेंना सुस्रांनाय राहा महरै थाबैनो लानो गोनां राहाफोरा जादों :
1. फुख्रिनि दैयाव जायखिजाया राहाजों बार जगायनाय एबा फुख्रियाव बार नांहोनायनि राहा लानो नांगौ । बे बिथिङाव बार जगायनाय दाजेम Aeratorबाहायनाया जोबोर मोजां राहा ।
2. बार जगायनाय दाजेम Aeratorगैयाब्ला दै सारग्रा पाम्पजों फुख्रिनि दैखौनो दैखांनानै फिन फुख्रियावनो सारनानै होनो नांगौ ।
3. फुख्रियाव हांसो हगारनानै एबा गोलाव दान्दाजों दैयाव बुनानै बार खारस्रा होनाय राहाजों खायसे मोजां फिथाइ मोननो हागौ ।
4. नाव थायोब्ला गेदेर फुख्रियाव बे खर’निफ्राय बै खर’सिम बैथाखौ गोबारै सोमावनानै जावनो हायो । बैथाखौ एरैबायदि सोमाव जाहाथे गोबां दौहौ जायो आरो बारा मोजाङै गोसारनो हायो ।
5. पाम्पनि हेफाजाबाव मोजां फुंखानिफ्राय गोजों दै गोजौनिफ्राय सारनानै होयोब्लाबो मोजां फिथाय मोननो हायो ।
6. दैनि हाग्रा बंग्राखौ बोस्रांना आरो सेरनि दंफांफोरखौ दानस्रांनानै मोजाङै सानदुं बार नांनाय खाबु खालामनानै होनो नांगौ ।
7. जेंनाया मोजाङाव फैयागौमानि साननैसो जायखिजाया हासार एबा आदार होनायखौ दोनथ’ नांगौ ।
8. जुदि नानि बिबाङा नांनायनिख्रुइ बांद्राय जायो, जे सारनानै गेदेर नाफोरखौ हमनानै फुख्रियाव नानि बिबांखौ जेसेबां हायो खम खालामनांगौ । फाननो हाथाव नाफोरखौ हमनानै फाननायनि राहा लायोब्ला इसेब्लाबो ख’हानिफ्राय बारग’नो हागोन ।
9. फुख्रियाव नेमखान्थि बादियै गनायजाथाव बिबांनि सुनै होबाय थानांगौ । सुनैया दैनि गुबुन गुबुन रासायनारि गुनफोरखौ थियै लाखिनायजों लोगोसे दैयाव दैलाव अक्सिजेन हमथाना लाखिनायाव हेफाजाब होयो ।
10. आथिखालाव हाथायाव फुख्रिनि दैयाव गोख्रोंयैनो अक्सिजेन बांहोनाय मुलि मोननाय जायो । ना बिफाननि सुबुं एबा ना रोंगौसानि सुबुरनाव बेबायदि मुलिफोरखौ बाहायनांगौ ।
गोसोआव लाखि ना फिसिनायाव गोनांथि गोयै रासायनिक मुलि, हासार बायदि बाहायनाया बानजायथाव नङा ।
